Drejtori sportiv i Lazios, Igli Tare, është i bindur se as sulmuesi shumë i kërkuar maqedonas Goran Pandev dhe as kapiteni Tommaso Rocchi, nuk do të largohen nga Lazio.
“Goran është një prej pikave tona të referencës. Lotito do të bëjë gjithë çka të mundet për ta vazhduar marrëveshjen. Dëshirojmë ta mbajmë në klub dhe synojmë këtë”, ka thënë Tare.
Ish-sulmuesi i kombëtares shqiptare ka shtuar se klubi nuk planifikon as shitjen e sulmuesit Tomasso Rocchi, por ekipi mund të përforcohet së paku edhe me një lojtar.
“Rocchi do të mbetet me ne. Ai është kapiteni ynë dhe nuk do të largohet. Nëse na jepet mundësia në afatin kalimtar dimëror, mund vetëm të angazhojmë lojtar i cili do ta përmirësojë kualitetin e ekipit”, ka shtuar Tare.
Sipas spekulimeve të fundit, mesfushori brazilian i Manchester Cityt, Elano, i cili është i pakënaqur me angazhimin nga trajneri i ri, Mark Hughes, mund të jetë një prej përforcimeve të klubit romak.